Kristian Joensen hevði áhugaverda samrøðu við Magnus Powell mikudagin, har teir komu víða um viðvíkjandi KÍ. Ein av spurningunum, ið eisini varð umrøddur, var leiktíð til betrideildarleikarar í 1. deild.

- Taka vit Jonn Johannesen, so er hann júst komin fyri seg. Hansara kroppur hevur ikki megnað at spælt fullar dystir fyrr enn nú, og tí hevur tað verið óhugsandi, at hann skuldi spæla við 1. deild eisini. Claes Kronberg, Filip Brattbakk, Mads Boe Mikkelsen og Deni Pavlovic hava allir verið skaddir, og tí hava teir spælt lítið seinastu tíðina. Allir hesir leikarar hava heldur ikki verið nóg væl fyri til at spæla heilar dystir í Betri Deildini, og tí hevur tað verið óhugsandi, at teir skulu leika dagin fyri eisini, sigur Magnus Powell.

- Fleiri av hesum leikarum hava bert spælt 30 minuttir av einum betrideildardysti, tí tað er tað, sum kroppurin hevur hildið til beint nú.

- Til dømis segði eg við Dávid Andreasen fyrr í ár, at jú fleiri minuttir hann spælir við 1. deild, jú færri minuttir kemur hann at spæla í Betri Deildini. Hann hevur stórt potentiali og hevur tikið seg sera nógv fram.

- Eg havi alla tíðin ynskt at síggja Dávid í Betri Deildini, tí hann er ein góður leikari, og nú hevur hann eisini víst, at hann kann taka ábyrgd, byrja dystir og gera tað gott.

- Annars hava Latif, Børge og Milo spælt so at siga allar dystir við 1. deild.

- Eg vil hava, at leikarar spæla mest møguligt, og tí hava vit altíð fokus á tað, og umrøða tað støðugt innanhýsis í venjarahópinum, segði høvuðsvenjarin at enda við Norðlýsið.