Vit hava havt sjálvan høvuðsjólamannin í telefonini!

Hann boðaði spentur frá, at Jólaskipið hevur loyst, og er farið at sigla av Norðpólinum við beinari kós móti Føroyum – beint ímóti Klaksvíkini, har teir vænta at leggja at fríggjakvøldið.

“Veðrið er av tí besta, og Norðlýsið dansar á himmalhválvinum” segði hann, tá hann varð spurdur, hvussu ferðin gekk.

“Vit vænta gott veður allan vegin til Føroya, og vit gleða okkum at síggja øll tey fittu børnini!”

Høvuðsjólamaðurin greiddi frá, at jólamenninir hava arbeitt dag og nátt, pakkarnir eru klárir, og skipið er pyntað við glitrandi jólaljósum.

Hann er vísur í, at ferðin fer at ganga, sum hon skal.

Hann hevði eisini eina heilsan til øll tey spentu børnini:

“Eg veit, at tit hava bíða leingi, men nú verður tað skjótt!”

Jólaskipið væntast á Leirvík kl. 17.30 og í Klaksvík kl. 18.00 fríggjakvøldið 20. desember.

Nú er bert eftir at telja dagarnar, til vit fáa vitjan av Jólaskipinum – og sjálvum høvuðsjólamanninum og øllum hinum festligu jólamonnunum.