Tað er royndur lutur, at sessurin í fíggjarnevndini verður brúktur til sæta sínum egnu. Viðhvørt situr skeggið sera nær høkuni. Sum til dømis, tá vit í gjár vístu á løgið samanfall millum ein kassameistara og fíggjarnevndarlim.

Hóast hetta dømið er serligt, so er púra vanligt, at nevndarlimirnir seta síni týðuligu fingramerkir á raðfestingarnar. Suðuroyartingfólk hála størri og smærri upphæddir suðureftir, eysturoyingar eystureftir og norðoyingar norðureftir.

Soleiðis er spælið.

Men er árið í ár eitt undantak? Norðlýsið hevur hugt í álitið, sum samgongumeirilutin í fíggjarnevndin lat úr hondum í vikuskiftinum. Úr raðfestingarrúgvuni síggja vit m.a. hesi átøk í landnyrðingsføroyum:

• Játtaðar verða 2 mió. kr. til at útvega radiosignal í Viðareiðistunlinum.
• Játtaðar verða 2,5 mió. kr. til at prosjektera Gøtudalstunnilin.
• Játtaðar verða 2 mió. kr. til at gera arbeiðið ígjøgnum Gøtugjógv liðugt
• Íverksetarahúsið í Klaksvík fær 200 túsund aftrat
• Játtanin til Miðnám á Kambsdali verður hækkað við 1,3 mió. kr. til FSA útbúgving
• Játtaðar verða 400 tús. kr. til læknaviðtalur ísv. prostata-krabba á Klaksvíkar sjúkrahúsi
• Umsorganarheimið Gloria fær 200 túsund aftrat

Spurningurin er so, um okkurt verður broytt millum aðru og triðju viðgerð. Tað ljóðar í øllum førum, at okkurt verður gjørt fyri Mentanarhúsið Varpið.

Livst so spyrst.

Triðja viðgerð av fíggjarlógini fyri 2026 verður í morgin, hósdagin.