Bjørt Samuelsen broytti í gjár raðfylgjuna av málunum um Suðuroyartunnil og hægri pensjónsaldri um, soleiðis at Suðuroyartunnilin var fyrr á skrá. Tað gjørdi, at tá ið Løgtingið hevði atkvøtt tað málið ígjøgnum, kundi løgmaður útskriva val.

Tað var greitt til 2. viðgerð, at mong javnaðartingfólk vóru hørm um at muga atkvøða fyri, tí tey høvdu bundið seg til eina samgonguavtalu um tað. Seinni um kvøldið gjørdist greitt, at forkvinnurnar í hinum báðum samgonguflokkunum, Tjóðveldi og Framsókn, ikki høvdu álagt sínum tingfólkum at bera málini bæði ígjøgnum. Teimum stóð frítt at stemma málini niður ella blankt, og tí møguleikanum tóku 4 teirra av.

Við at útskriva val millum málið um Suðuroyartunnil og pensjónsmálið gjørdi løgmaður, at javnaðarfólkini ikki noyddust at atkvøða fyri pensjónsmálinum við ringum tannabiti aftur. Málið fall burtur, tá nývalið varð útskrivað.

Pensjónsaldurin hækkar upp í 68 ár í 2030 og steðgar so har, uttan so at ein framtíðar-samgonga aftur fer at skjóta upp at hækka hann enn meira. 

Nývalið verður hósdagin 26. mars.