Nú er so spurningurin, hvussu leingi hann fer at liggja við kulda og kava. Sum veðurkortini eru í morgun, so verður tað nokkso leingi – tó ikki javnt og samt alla tíðina. Okkurt avbrot onkran fyrrapart við lýggjari luftráki sunnaneftir, men so fer hann aftur at koma høgt.  

Fara vit til veðrið um vikuskiftið, so er í dag eitt lítið lot av landnyrðingi, minni enn 5 m/s, hálvskýggjað, sólglottar og kavaælaveður, stundum grov æl.

Í kvøld lítið lot lækkar hann niður í eystan og seinni niður í sunnan. Sama vindferð – t.e. minni enn 5 m/s, skýggjað loft og okkurt kavaælið.

Í nátt veksur hann vindin upp í 8 til 13 m/s, enn skýggjað men nú ælaveður bæði við regni og kava ella vátakava, stundum eru grov æl.

Hitin í dag úr 3 kuldastigum upp í 3 hitastig, í hæddunum kann hann fara niður í 5 kuldastig.

Í morgin er upp í eitt frískt lot vestan, 3 til 8 m/s, hálvskýggjað og sólglottar og okkurt ælið, kanska við vátakava.

Seinnapartin veksur hann eitt lítið sindur upp í frískan vind vestan, 5 til 10 m/s, skýggjað og kavaæl. Um kvøldið lítið lot norðan, minni enn 5 m/s, samdrigið og kavaæl. Sunnunáttina lot til frískt lot av landnyrðingi, 3 til 8 m/s.

Hitin millum 1 kuldastig og 5 hitastig.

Sunnudagin fara vit at fáa upp í strúk í vindi av landnyrðingi, 8 til 13 m/s, samdrigið og kavaæl. Um kvøldið hækkar hann upp í norðan, sami vindur og enn samdrigið og kavaæl. Hitin úr 2 stigum undir frostmarkinum upp í 3 stig oman fyri frostmarkið.

Gott vikuskifti.