Bárður Nielsen reduserar harvið Føroyar til eina kommunu í Danmark, sum Fólkatingið tekur avgerð um.

Áhaldandi roynir hann at polaisera og skapa ótta, heldur enn at standa saman við restini av føroysku flokkunum um, at Føroyar eru eitt land, og at samráðingar tí sjálvsagt eru stjórn til stjórn.

Tað er eitt sindur komiskt, tá veruleikin er, at Danir hava skilt hetta og at samstarvið okkara millum er konstruktivt, men at formaðurin fyri Sambandsflokkin ikki skilir hetta. Hann er danskari enn danin, og kanska stúrin um politiska tilverugrundarlagið hjá Sambandsflokkin, tá øll onnur vilja flyta Føroyar fram sum sjálvstøðugt land, og hann er tann einasti sum sær Føroyar sum eina danska kommunu.

Hvat annað skuldi hendan endurtøkan verið eitt útrykk fyri?

Tí tað er ikki at skilja hví Bárður Nielsen heldur, at avgerðir vegna Føroyar eru betri tiknar í Danmark enn í Føroyum.

Eg spyrji bara:

Hevur hann onki álit á føroyingum ella hvat?

Annars frálíkt at lesa, at Bárður Nielsen heldur, at vit skulu sita við borðið har avgerðir verða tiknar.

Tó trist, at hann tá sipar til borðið á Fólkatingi.

Samráðingarborðinum í Føroyum er hann lopin frá. Har sita annars 5 av 6 flokkum, og viðgera okkara framtíð sum sjálvstøðugt land.

Eg haldi, at Bárður Nielsen kann taka tað púra róligt.

Vit fimm skulu nokk taka ábyrgd, og tala føroya søk í øllum lutum, eisini í verju og trygdarmálum. Tað arbeiðið er áhaldandi.

So Bárður Nielsen nýtist ikki at kvøða hesa afturvendandi vísuna um, at vit onki vilja og onki duga.

Hesin áhaldandi tørvurin at spjaða, misbrúka ótryggu heimsstøðuna og leypa ótta á føroyingar, tí at vit ikki samráðast stjórn til parlament, men stjórn til stjórn, er nokk bara eitt útrykk fyri, at argumentini hjá Sambandsflokkinum eru uppi.

Sirið Stenberg, forkvinna í Tjóðveldi og landsstýriskvinna í Uttanríkis- og Vinnumálum.