Um tað er ein niðurtúrur sum nú kemur vegna manglandi summarfrí vegna Evropadystirnar í summar skal verða ósagt, men KÍ er dalað nógv í álopspartinum síðstu tveir dystirnar móti sterkari mótstøðu, tí hvørki móti HB ella Víkingi eydnaðist at skora mál. Hetta var fyrsti dystur eftir landsliðssteðg og ofta hava teir dystirnir tað við at skuffa, tí rytma og annað er ikki optimalt eftir steðg í tvær vikur. Eisini spæla fleiri leikarar hjá KÍ hálvskaddir, sum teir hava gjørt leingi, og tað sást.

Víkingur var skert, har tveir leikarar blivu seldir í summar og har aðrir tríggir høvdu leikbann, men hóast hetta so var langt millum stóru málmøguleikarnar hjá KÍ. Tríggjar ferðir var nær við. Páll A. Klettskarð skallaði viðsíðuna av, meðan Patrik Johannesen, ið ikki hevur skorað mál í landskappingini síðani 31. mai, ikki rakti bóltin úr góðari støðu. Í yvirtíðini fekk KÍ einastu møguleikarnar í seinna hálvleiki, tá tað tríggjar ferðir í sama álopi var nær við. Víkingur hevði ongan stóran málmøguleika í dystinum, men kundi havt fingið ein, tá Deni Pavlovic feldi Jørgen Nielsen. Deni var heilt klárt síðsti maður og tók ein upplagdan málmøguleika frá Víkingi og átti helst at fingið reytt kort í støðuni, tá áleið eitt korter var eftir.

0-0 gjørdist úrslitið og tað merkist ein avís ónøgd millum heimaáskoðararnar í seinna hálvleiki, tí KÍ skapti so lítið. Men tað verður helst gloymt, um KÍ verður føroyameistari seinni í heyst. Og tað eigur ikki at blíva nakar trupulleiki hjá KÍ, hóast eitt formdykk er sjónligt í løtuni. Men skal KÍ vinna løgmanssteypið móti júst Víkingi 31. oktober, so verður neyðugt við hugflogsríkari fótbóltsspæli enn hesar báðar síðstu heimadystirnar.