Landsstýriskvinnan hevur boðað frá, at hon ætlar at leggja eina nýggja veðurlagslóg fyri Løgtingið. Tað reisir sjálvsagt fleiri spurningar.

- Tað, sum gongur fyri seg í heiminum í dag, er ikki eitt grønt orkuskifti, men heldur eitt grønt uppískoyti. Nýtslan av olju og øðrum fossilum orkukeldum heldur fram at vaksa og verður ikki væntandi minkað, fyrr enn eftir 2030 – hóast grøna orkan eisini veksur ár fyri ár.

Harafturat vil Elsebeth hava at vita, um veðurlagslógin fer at forða fyri oljuleiting.

- Vit brúka framvegis nógva olju, og tað fara vit at gera í mong ár afturat. Vit noyðast undir øllum umstøðum at innflyta olju í nógv ár enn – og tá er tað meira skynsamt, eisini umhvørvisliga, at framleiða hana her heima, um tað ber til. Tað má veðurlagslógin ikki forða fyri.

Harafturat minnir Elsebeth landsstýriskvinnuna á, at vanligi føroyingurin er longu hart sperdur fíggjarliga, og spyr tí eisini, um føroyingurin fer at fáa fleiri gjøld og hægri skatt í sambandi við veðurlagslógina.

Spurningarnar, Elsebeth Mercedis Gunnleygsdóttur hevur sett Margit Stórá, landsstýriskvinnu, eru hesir:

• Verða forðingar gjørdar fyri framtíðar oljuleiting í Føroyum við veðurlagslógini?
• Kann tað væntast, at kostnaðurin fyri el verður dýrari við lógini?
• Ætlar landsstýriskvinnan at binda komandi Løgting og ættarlið niður við eini veðurlagslóg, hóast veljarin í 2030 ella 2040 møguliga ikki vil fylgja teimum málum, sum verða framd nú í 2025?