SSL stjórin: Royndarsiglingin gekk sera væl
Teistin byrjar eftir ætlan á Kalsoyarleiðini, tá rampan á Syðradali er liðug um hálvan august, sigur Niels Juel Arge stjóri á Strandfaraskip Landsins
Klaksvíksmegin er ætlanin, at Teistin brúkar langu kei átta vikur, inntil ein umbygging av rampuni í Klaksvík er liðug. Talan er um at flyta rampuna ein metur úteftir og at taka burtur av verandi stólpa, upplýsir Niels Juel
Sam verður eftir hetta eyka-, avloysara-, farma- og útleiguskip og skal eftir ætlan setast í enn betur stand. T.d kann manningarøkið flytast fram í fremru salong, og hyggjast skal eisini upp á, um motorarnir kunnu fáast at larma minni ella møguliga skifta teir út. Sam er nokk besta farmaskip at brúka ímillum føroysku oyggjarnar, sigur Niels Juel.
Mikudagin royndi Teistin atløgubryggjuna vestarumegin.
- Royndarsiglingin hendan dagin gekk sera væl, og við nøkrum boyum niðurvið keiini passar atløgan sum fótur í hosu, sigur Niels Juel at enda við Norðlýsið