Samstarvið fevnir um eftirlit við persónum og vørum, herundir avgjaldsskyldigum vørum, og um arbeiðið ímóti hvítvasking og ólógligum vørum sum rúsevnum og dopingevnum. Tað snýr seg eisini um tiltøk, sum kunnu styrkja samstarvið og menna førleikarnar hjá tollmyndugleikunum. Jú betur samstarvið virkar, tess lættari verður hjá myndugleikunum at útinna sínar uppgávur.

Norðurlendska tollsamstarvið hevur nógv ár á baki og er sera vælvirkandi. Í netverkinum verður serliga umrøtt, hvussu dagligu arbeiðsumstøðurnar hjá tolleftirlitsfólki kunnu betrast. Dentur verður lagdur á rák í kriminellum umhvørvum, nýggja tøkni, avtalur um til dømis dátudeiling og samstarv um skeið og førleikamenning hjá tollfólki.

Søguliga hava stríð altíð skapt nýggjan kriminalitet tvørtur um landamørk. Tað kann vera ólógligur flutningur av peningi, rúsevnum og vápnum, umframt fólk, sum fara ólógliga um landamørk. Altjóða spenningurin, kríggið í Ukraina og vaksandi áhugin fyri Arktis gera hetta arbeiðið enn meira viðkomandi. Tollmyndugleikarnir fylgja tí neyvt við gongdini í kriminaliteti tvørtur um landamørk, hvørjar avleiðingar hann kann hava, og hvussu hann best kann fyribyrgjast og steðgast við samskipaðum átøkum.