Kvinnurnar hjá KÍ liggja á ovasta plássinum í meistaradeildini. Tó er tað bara málmunur ið skilir KÍ frá HB.

Kvinnurnar hava víst sera gott spæl gjøgnum stóran part av kappingini, og fleiri leikarar hava ment seg og víst góðar taktir.

Fyri einari viku síðani valdi Pætur Smith Clementsen, høvðusvenjari hjá kvinnulandsliðnum, at úttaka 20 leikarar, harav 7 vóru úr KÍ. Teir 7 leikararnir vóru, Óluva Joensen, Sanna Svarvadal, Durita Hummeland, Birita Ryan, Sólja Ernstdóttir, Tórunn Joensen og Eyðvør Klakstein.

Orsakan av skaðum og øðrum, hevur verið neyðugt hjá venjarinum at sent boð eftir 3 leikarum afturat nú landsliðið ger klárt at fara leiðina til Tbilis.Tær tríggjar eru Jancy Mohr, Tóra Mohr og Malena Olsen.

Sæð við Norðlýsið brillum, so er hugaligt at síggja at KÍ kvinnurnar hava bitið seg fastar á landsliðnum.

Spennandi verður at fylgja landsdystinum, ið verður spældur fríggjadagin 5. juni.