Tað var ein greiður sigur, har KÍ var omaná størsta partin av dystinum. Eina løtu í byrjanini hevði HB nøkur hornaspørk, ið komu tætt inn undir málið, men Óluva Joensen var tryg í feltinum.

Fyrsta málið kom stutt fyri hálvleik, eftir at Sólja Ernstdóttir hevði lagt inn fyri, og úr stuttari fjarstøðu legði Durita Hummeland KÍ á odda.

Seinni hálvleikur var ikki meiri enn byrjaður, tá ið bólturin aftur lá í málinum hjá HB.

Eftir innleggi frá Tórun Joensen, sum ferð eftir ferð rann seg leysan í vinstru síðu, kundi Maria Vinjardsdóttir Johansen smekka til og leggja bóltin heilt út við stongina, so málmaðurin hjá HB ikki kláraði at bjarga.

Í 73'inda minutti var Durita Hummeland enn einaferð á rætta stað og gjørdi tað til 3-0, eftir uppleggi frá Eyðvør Klakstein.

Sunnudagin 22. mars fer landskappingin av bakkastokki, og tá skal KÍ møta 07Vestur á útivølli.

Norðlýsið ynskir KÍ hjartaliga til lukku við stórsteypinum.