Norðlýsið vitjaði hjá Bakkafrost á Glyrum í seinastu viku. Ørindi okkara vóru at frætta um gongdina hjá alirisanum. Regin Jacobsen var sum vant sera væl upplagdur og greiddi frá við eldhuga um allan aktivitetin hjá Bakkafrost. Burturúr komu fleiri greinar, sum vit leggja út á heimasíðuna hesa vikuna. 

Regin sigur soleiðis: – ”Lat meg siga tað beinanvegin, at ttá ið tosað verður um vøkstur í alivinnuni, so verður tosað um vøkstur av framleiðsluni. Tað merkir ikki, at sølan ella vinningurin eru vaksin líka nógv. Fiskurin kann eisini liggja á goymslu, og vit økja eisini um biomassan í sjónum til at selja árið eftir.

Fyri Bakkafrost kann eg siga, at effektiviteturin á sjónum hevur ongantíð verið betri enn nú. Vit hava eitt felli, sum liggur niðri á 10% frá útseting til tøku, og tað er nakað av tí tað lægsta, vit nakrantíð hava havt. Tú skalt eini fimtan ár aftur í tíðina fyri at finna lægri felli. Og vøksturin hevur verið methøgur, tí fiskurin trívist ómetaliga væl.

Tað hevur sera nógv at siga, at fiskurin hevur góða heilsu. Tað ger, at tú kanst fáa eitt øgiliga gott úrslit burturúr, og nú tykist tað, sum um hesi viðurskiftini viðvíkjandi fiskaheilsu ganga upp í eina hægri eind. Vit hava betri vøkstur og lægri felli enn aðrir, og vit hava væl størri fisk – vit liggja væl omanfyri 6 kilo, ið er eitt kilo størri enn í Chile og hálvtannað kilo størri enn í Noregi – so vit hava óhoyrt vøkur biologisk lyklatøl.

Tað, sum gekk galið í 2025, var laksaprísurin, og honum hava vit ikki valdið á”, sigur Regin Jacobsen við Norðlýsið.