Ferjan til Kalsoynna fer at taka 145 ferðafólk og upp til 20 bilar, meðan tann minna, ið fer at sigla til Svínoynna og Kalsoynna fer at taka 75 ferðafólk og upp til 2 bilar. Tað er skipasmiðjan Mest, ið hevur projekterað báðar ferjurnar. Kalsoyarferjan er longu boðin út og verður tí tann fyrra av teimum báðum. Jóhan Christiansen, landsstýrismaður, dugir ikki at seta dato á enn, sigur hann, men byrjað verður antin í ár ella fyrst í komandi ári upp á Kalsoyarferjuna, og landsstýrismaðurin metir, at tað fer at taka 1 til 2 ár frá tí at byrjað verður.

20 milliónir eru settar av í ár, 68 milliónir komandi ár og 100 milliónir árið eftir, men hetta triðja árið fer játtanin eisini til aðrar ferjur enn tær báðar í Norðoyggjum.

Ferjan til Kalsoynna verður skraddarabygd til júst farleiðina og verður ein el-ferja.