Fyrireikingarnar vóru í hæddini í kvøld, tá vit komu á gátt. Ivan Isaksen stóð við grýtirnar og kókaði ræsta kjøtið, sum skal borðreiðast í morgin, meðan starvsfólk annars gjørdu alt klárt til gestirnar.

Stjórin í KBI, Rói Clementsen, sigur:

“Vit gleða okkum at savna viðskiftafólk og samstarvsfelagar aftur í ár. Vit hava lagt okkum eftir at gera eitt hugnaligt kvøld við góðum mati, undirhaldi og nógvum jólahugna.”

Til tess at seta tann rætta jólastemningin verður tónleikur við vælumtókta Steintóri Rasmussen. Eisini fer Hans Hjalti Skaale at tryggja, at gestirnir fáa eina serliga løtu við undirhaldi og sangi. Tann tiltikna spurnarkappingin, ið Kristian Joensen skipar fyri, verður sjálvandi aftur á skránni.

Omaná ræsta kjøtið verður rísalamang, og hvør veit, kanska er ein mandla at finna, sigur Rói smílandi.

Ein siðvenja, sum savnar fólk

Jólahaldið hjá KBI er ein gomul siðvenja, sum bæði starvsfólk og viðskiftafólk gleða seg til hvørt ár. Tað er ein møguleiki at savnast, hugna sær saman og ynskja hvør øðrum eini gleðilig jól. “Vit leggja stóran dent á, at KBI skal vera eitt stað, har fólk kenna seg væl, og hetta kvøldið vísir tað seg veruliga,” sigur Rói.