Farið varð við Sam kl. 8.00 og síðani við bussi til Húsar.

Vit fóru inn í hugnaliga skúlan á Húsum, har vit settu taskur og annað frá okkum.
Kl. 8.45 byrjaði jólaguðstænastan, har børnini frá dagstovninum Blómugarður á Húsum og nøkur dagrøktarbørn úr Klaksvík eisini luttóku.

Aftaná guðstænastuna vórðu vit boðin niðan aftur í skúlan, har vit fingu saft, mandarinir og heimabakaðar smákøkur frá Emmu Lý.

Tíð var eisini til at hugna okkum við borðspølum og øðrum, og eisini fóru summi út á vøllin at spæla bólt eina løtu.
Veðrið var av tí besta, so vit vóru sera heppin.

Aftaná ein sera góðan og hugnaligan morgun á Húsum gekk leiðin aftur til Klaksvíkar, fyrst við bussinum og síðani við Sam.

Komin aftur á skúlan høvdu vit eina hugnaløtu í floksstovuni, ta løtuna, sum eftir var av skúladegnum.

Tað er stuttligt at hoyra frá skúlaflokkum, tá dagarnir eru øðrvísi og dagstúrar eru á skránni.

Vit takka fyri frálíku ferðafrásøgnina.