Eini 40 gestir úr norðurlondum, Kanada, Nýfundlandi, Nýsælandi og Japan vóru í ferðalagnum. Á skránni í Klaksvík vóru framløgur um grind og drápsháttir í Føroyum og í Japan. Mr. Kai frá Small Costal Waling Association vísti myndir og tosaði um hvalaveiðu í Japan. Sìðan hevði Esmar Joensen frá Grindamannafelagnum eina framløgu um hvalaveiðu, drápsháttir og um hví vit framhaldandi eiga at veiða og eta grind í Føroyum.

Eftir hesar framløgur í býráðshøllini varð skipað fyri einum fundi millum Japonsku sendinevndina og borgarstjóran. Á hesum fundi bleiv tosað um felags mentanarlig áhugamál og møguleikar fyri øktum samstarvi millum londini bæði.

Karl Johansen, borgarstjóri, var sera fegin um vitjanina og møguleikan at heilsa uppá tey mongu vitjandi.

- Hetta var eitt frálíkt høvi at heilsa uppá okkara vinir úr Taiji. Vit hava nógv til felags og hetta er avgjørt við at styrkja sambandið millum býirnar báðar. Eisini var tað gleðiligt at síggja so nógvar gestir frá Nammco samstarvinum hugna sær í Klaksvík.

Seint seinnapartin fór ferðalagið at vitja Norðoya Fornminnisavn, har Klaksvíkar dansifelag greiddi frá um føroyska dansin. Síðan varð farið í kappróðrarneystið, har Fróði Waag og Sonja Kjølbro greiddu frá um føroyska bátin og um góðu gongdina hjá Klaksvíkar Kappróðrarfelag seinnu árini.