Veðrið í vikuni
Hátrýstveður alla vikuna, sum stendur fyri framman. Eitt hátrýst fer at liggja yvir bretsku oyggjunum, og vestan fyri miðjuna á tí fer hann at lota av útsynningi í móti Føroyum. Vindferðin fyri tað mesta upp í frískt lot, 8 m/s, tó onkra løtu upp í frískan vind – t.e. 10 m/s.
Einki brúgvalag við regni sæst ætla sær hendaveg fyrr enn seinnapartin fríggjadagin. Men okkurt hissini ælið kann tó vera í støðum.
Luftin, sum fer at reka í móti okkum, er nokkso lýggj. Hon kemur úr Norðurevropa, og har er nokkso lýtt – meiri enn 15 stig um miðjan dag. Hon kølnar nøkur stig á vegnum norður til okkara, men tað fer at vera heilt hampuliga lýtt alla vikuna.
Veðrið í vikuni – dag fyri dag.
Mánadagin:
Lítið lot av útsynningi, minni enn 5 m/s, skýggjað, í støðum vestanfyri kanska mjørki, tó út á dagin onkur sólglotti og yvirhøvur turt. Hitin 6 til 10 stig.
Týsdagin:
Lot til frískt lot av útsynningi, 3 til 8 m/s, skýggjað og møguliga okkurt ælið. Hitin 7 til 11 stig.
Mikudagin:
Frískt lot til frískan vind av útsynningi, 5 til 10 m/s, hálvskýggjað við sólglottum og bert okkurt ælið. Hitin 7 til 11 stig.
Hósdagin:
Frískt lot til frískan vind sunnan, 5 til 10 m/s, smáskýggjað, sól og yvirhøvur turt. Hitin 7 til 11 stig.
Fríggjadagin:
Lot til frískt lot sunnan, 3 til 8 m/s, skýggjað og yvirhøvur turt, men út á dagin verður ælaveður ella regn. Hitin 7 til 11 stig.