Fólkaflokkurin fekk ikki færri enn 3 norðoyingar valdar á Løgting, og teir eru Beinir Johannesen, Elsebeth Mercedis Gunnleygsdóttur og Árni Skaale. Sambandsflokkurin fekk onki norðoyaumboð, men har er Hermann Samuelsen 3. varalimur, og hann kann gerast 2. varalimur, um Anna Falkenberg halgar sær Fólkatingið burturav.

Í Sjálvstýri er Sámal Petur í Grund beinleiðis valdur inn, meðan Sylvia Thomsen úr Ánunum er 1. varafólk. Her verður talan so um eina 1:1-útskifting, um Sámal Petur fær landsstýrissess. Tjóðveldi hevur ongan norðoying í sjálvari tingmanningini, men júst sum til seinasta val er Eirikur í Jákupsstovu 1. varafólkið. Og í Miðflokkinum er Steffan Klein Poulsen úr Norðdepli beinleiðis valdur.

Sostatt eru 5 beinleiðis innvald tingfólk úr Norðoyggjum og 3 norðoyingar afturat eru potentiell varafólk. Umframt hetta er Eyðgunn Samuelsen, ið varð uppstillað av Norðoya Javnaðarfelagi, eisini í spæli sum varafólk.