Kuldin fer ikki at koma aftur fyrr enn fram ímóti vikuskiftinum, hitalagið fer upp í 10 stig týsdagin, sum fer at vera lýggjasti dagurin. Týsdagurin fer eisini at vera vátasti dagurin, hann fer næstan allur sum hann er í regn. Fyrstu dagarnar í vikuni turt ella okkurt ælið, hósdagin regn eitt skifti, og fríggjadagin kavaæl.

Veðrið í vikuni – dag fyri dag.

Mánamorgunin 3 til 8 m/s av landnyrðingi, sum frá líður veksur upp í 5 til 10 m/s. Sólglottar og bert okkurt ælið. Um kvøldið gongur hann niður í landsynning, og um náttina veksur hann vindin upp í 8 til 13 m/s. Hitin 3 til 7 stig.

Týsdagin 10 til 15 m/s av landsynningi, seinni av suðuri, samdrigið og regn. Fram móti kvøldi veksur hann upp í 13 til 18 m/s av útsynningi, skiftandi skýloft og ælaveður. Hitin 5 til 10 stig.

Mikumorgunin minni enn 5 m/s av ymsum ættum, men sum frá líður veksur hann upp í 5 til 10 m/s, av landsynningi. Allan dagin skiftandi skýloft og okkurt ælið. Hitin 4 til 8 stig.

Hósdagin fer hann at liggja millum sunnan og eystan, minni enn 5 m/s, skiftandi skýloft og okkurt ælið. Út á dagin vaksandi til frískt lot upp í 5 til 10 m/s av landsynningi, seinni støkkur hann vesturum til útsynning. Allan dagin samdrigið og eitt skifti regn. Hitin 3 til 7 stig.

Fríggjadagin vestan, 10 til 15 m/s, eitt skifti skrið, 18 m/s. Skiftandi skýloft og ælaveður, kanska heglingur. Hitin 2 til 6 stig.