Hitalagið fer eitt sindur upp, og saman við nógvum regni sunnunáttina, skulu vit rokna vit at stórur partur av kavanum fer vekk.

Høgættin er ikki leingi vekk á hesum sinni. Hon er longu aftur sunnudagin.

Taka vit veðrið hetta til mánanáttina, so er í dag upp í eitt frískt lot norðan, 3 til 8 m/s, skýggjað ella hálvskýggjað við sólglottum og yvirhøvur turt. Í nátt gongur hann eysturum og fer at liggja millum norðan og landnyrðing. Sama vindferð, 3 til 8 m/s, loftið hálvskýggjað, og í støðum okkurt kava- ella vátakavaælið. Hitin millum frostmarkið og 4 stig, í nátt niður í 3 kuldastig.

Í morgin byrjar hann við at liggja millum norðan og landnyrðing, 3 til 8 m/s, men sum frá líður gongur hann niður í eystan. Hálskýggjað, turt og sólglottar, men fram ímóti middegi skýggjað, og hann veksur upp í frískan vind av landsynningi, 5 til 10 m/s. Út á kvøldið veksur hann upp í hvassan vind, 10 til 15 m/s, samdrigið og sum frá líður regn. Um náttina samregn. Hitin um morgunin og fyrrapartin úr frostmarkinum upp í 5 stig. Seinnapartin og um kvøldið 2 til 6 stig.

Sunnumorgunin upp í strúk ella hvassan vind av landnyrðingi, 8 til 15 m/s, skýggjað og regn ella ælaveður. Sum frá líður minkar hann vindin niður í frískan vind millum norðan og útnyrðing, 5 til 10 m/s. Tað verður hálvskýggjað og longri ímillum ælini. Hitin 2 til 6 stig.

Gott vikuskifti.