Í filminum vitjar ferðamyndamaðurin Aksel Hald-Christensen í Føroyum. Hann greiðir frá um føroyska mentan, bygdirnar og náttúruøkini, sum hann filmar. Filmurin er ikki nýggjur, men frá 1989; tað er tó ikki fyrrenn nú, at hann er vorðin talgildur og harvið tøkur at stroyma.

Tískil sær man í filminum Aksel Hald-Christensen sigla úr Esbjerg til Tórshavnar við ongum minni enn ferðamannaskipinum Winston Churchill. Í Tórshavn vitjar hann Vesturkirkjuna, Tinganes, Norðurlandahúsið, Skansan, plantaguna og onnur støð, og haðani fer hann millum annað til Eiðis, Tjørnuvíkar, Haldórsvíkar, Kvívíkar, Árnafjarðar, Vestmanna, Saksunar, Gjáar, fleiri støð í Suðuroy, til Húsavíkar og Mykinesar – og til Klaksvíkar.

”Danmark på film” er ein ikki-vinnulig síða, sum fevnir um ný-talgildar dokumentarfilmar, reportagur, lýsingarfilmar og mong onnur filmssløg úr Danmark, Grønlandi, Føroyum og Íslandi í tíðarskeiðnum 1897-2018. Ísland var í ríkisfelagsskapinum fram til miðskeiðis í 1900-talinum. Filmarnir eru frítt atkomiligir og stava úr arkivinum hjá Filminstituttinum. Í løtuni eru 3.200 filmar at finna har, og nýggir leggjast javnan afturat. Fleiri av filmunum krevja ikki, at man hevur serstøk rættindi til at síggja teir, men kunnu frítt hyggjast at og sýnast fram.

Filmurin sæst her:

Færøerne - Nordatlantens charmetrolde