Nýggj poddvarpsrøð: - Eg eri blivin kallað bæði "hora" og "golddigger"
Bilar stóðu uttanfyri húsini hvørt kvøld fyri at fylgja við. Allastaðni vóru eygu vend móti nýggja parinum. “Kend yvir nátt” eitur nýggja poddvarpsrøðin hjá Kringvarpinum
Innbakkin var fullur av boðum sum “hora” og “golddigger”. Fremmand fólk koma upp til hana og spyrja, hvat hon hugsar fyri sær. Í nýggjari poddvarpsrøð fortelur Poulina Øregaard Isaksen, hvussu hon upplivdi at vera tann, sum fólk slatraðu um.
Árið er 2020, og tað rennur saman millum Poulinu Øregaard og Karl Birgir Isaksen. Tey eru bæði í parlagi, tá tey møtast, og hann er 30 ár eldri enn hon. Fólk eru á gosi um nýggja parið.
Í trimum pørtum fortelur Poulina, hvussu hon upplivdi at vera tann, allar Føroyar tosaðu um. Um at fóta sær í einum nýggum veruleika, og tá tingini eru við at leggja seg bráðliga at gerast einkja sum 29 ára gomul.