Hanus Hansen er ein maður, sum fyllir nógv. Ikki bara fyllir hann sekstisjey ár, men eisini á tann hátt, at hvørt mansbarn í Klaksvík veit, hvør Hanus er, og hann hevur havt ein trivaligan part av klaksvíkingum í starvi upp á eitt ella annað tíðspunkt í lívinum.

Men mest fyllir hann hjá politikarum í Havn. Hanusi til heiðurs hava høvuðsstaðarpolitikarar gjøgnum árini samtykt uppboðssølur, menningarkvotur, revsitiltøk (tað kemur, tað kemur, nú jákupsstovumaðurin er farin á Eirargarð), fleiri hundrað broytingar í sjófeingislógini, antitrust og seinast ásetingar um nærstandandi feløg.

Eitt av mongu hjartaligu predikatunum nýtt um Hanus í miðstaðarøkinum er ”oligarkur”, og allir oligarkar við respekt fyri sær sjálvum hótta við regluligum millumbilum fólkaræðið. Tað ger Hanus eisini, siga tey í Havn, og Hanus eigur sostatt stóran lut í æruni fyri, at vit í dag hava so árvaknar vakthundar í Tinganesi, sum javnan bróta svøvn fyri at fara upp á barrikadurnar at verja fólkaræðið ímóti honum. Uttan Hanus hevði føroyska demokratiið helst bara dovnað burtur.

Men miðstaðarøkið hevur eisini aðrar stúranir. Eitt nú greiddi landsbankastjórin í hjartanemandi grein Føroya fólki frá, hvussu hon fekk ikki sovið um næturnar, tí ætlanir eru um ein Suðuroyartunnil. Samstundis gongur Ruth Vang febrilsk og minnir Føroya fólk í aðru hvørjari tíðindasending á, at hvørja ferð, ein føroyingur verður pensioneraður, veksur hennara haldførisavbjóðing.

Tí meðan oligarkarnir hótta demokratiið, hótta pensionistarnir Ruth’sa haldføri. Tað verður tí øgiligt, tá Hanus gerst bæði. Men ein hóttan ger í sær sjálvum ongan skaða; tvørturímóti heldur hon sum nevnt fólki ”oppe på dupperne” og forðar teimum í at hvíla ov leingi á laurberjunum.

Vit skulu tí als ikki stúra fyri, at politiska skipanin fer at gerast dovin og líkasæl, nú Hanus Hansen røkkur traditionella pensjónsaldrinum. Tvørturímóti munnu tey í Fíggjarmálaráðnum sita sum á nálum, nú hendan hóttanin úr norðuri víðkar um virksemið frá bert at hótta demokratiið til eisini at hótta haldførið.

Hjartaliga tillukku við 67-ára degnum, Hanus!