Samgongan virðir ikki norðurøkið
At seta tjóðveldistinglimin úr Norðoyggjum í Almannaráðið, hóast upplagdi sessurin í Fiskimálaráðnum stóð tómur, tykist vera gjørt við beráddum huga fyri at raka fiskivinnuna í norðurøkinum. Tað vísir seg nú í álitinum um broytingar í sjófeingislógini.
Eitt av málunum, sum samgongan ætlar samtykt seinni í vikuni eru broytingarnar í sjófeingislógini. Vit hava áður hoyrt skiparan og høvuðspartaeigaran í Pison Eyðstein Sørensen siga, at teir verða so hart raktir, tí teir eiga skipið saman við Kósini, at tað ikki loysir seg at halda fram við virkseminum.
Orsøkin til trupulleikan hjá Eyðstein Sørensen er broytingar í ásetingum um nærstandandi. Tað at Kósin eigur í ger at Pison ikki kann fáa sær meiri rættindi framyvir, samstundis sum Pison hevur mist 50% av sínum fiskikvotum, síðan teir byrjaðu fyri 6 árum síðan.
Hesar broytingar raka ikki einans Pison, men øll línuskipini og allar partrolararnar í Klaksvík. Línuskipini eru Klakkur, Jákup B, Pison, Núpur, Kvikk og Polarstjørnan. Partrolararnar eru Stjørnan og Polarhav, Safir og Smaragd, Jaspis og Ametyst og Fuglberg og Skoraberg.
Ætlanin við lógarbroytingini er at raka Hanus Hansen, men í veruleikanum verða teir, sum eiga skip saman við stjóranum á JFK fastlæstir í verandi støðu og kunnu ikki vaksa um sítt virksemi. Teir eru Jákup B - Óli M. Lassen og Helmar Lassen, Klakkur – Líggjas V. Johannesen og Bethuel V. Johannesen, Pison – Eyðstein Sørensen og Bjartur Thomassen.