Jákup Jacobsen, stjóri á Akstovuni vísir aftur at talan er um einvísa sentralisering, men sigur at annað var ikki til at taka nú stovnurin varð noyddur at spara.

- Intøkurnar sum stovnurin hevði frá bilasølunum eru minkaðar sera nógv - tí nýggjastu tølini vísa at bilasølan er minkað eini 70%.

- Samstundis heldur løgtingið fast við at stovnurin skal hava eitt yvirskot uppá 900.000 krónur í 2009.

- Vit bóðu løgtingið um loyvi til at hækka tænastugjøldini men hesum varð noktað og tí er veruleikin tann at stovnurin skal spara 2,1 mill. kr. í inniverandi árið og hettar svarar til 20% í mun til virksemið í 2008.

- Tað starvast 21 fólk á Akstovuni - men tað er ógjørligt hjá okkum at siga fólki úr starvið - tí hóast inntøkurnar eru minkandi so eru uppgávurnar tær somu.

- Vit eru tí noydd at tillaga raksturin á stovninum og hetta rakar hart tær tænastur, sum stovurin hevur veitt kring landið.

- Vit hava ikki møguleika at sýna stórar bilar í egnum hølum  í Klaksvík og tí hava vit havt ein leigusáttmála um ein grøv á bilverkstaðnum hjá Kjartan Simonsen - men tað leigumálið er uppsagt.

- Vit hava vanliga verið tvær ferðir um vikuna í Klaksvík til vanligu bilasýnini,  men hesi sýn verða nú skerd soleiðis at vit verða bert einaferð um vikuna í Klaksvík.

- Tað sama er galdandi fyri Vágarnar og Suðuroynna. Í Vágunum høvdu vit ætlanir um at byrja eitt samstarv við eitt verkstað - men hesar ætlanir eru nú sleptar.

- Tað er kostnaðarmikið at senda fólk út á bygdirnar og tí eru vit eisini noyddur at skerja talið á døgum tá vit eru í Norðoyggjum og í Klaksvík og hava royndir við fólkum sum ynskja at taka koyrikort, sigur Jákup Jacobsen, stjóri á Akstovuni.