Byrjað varð klokkan 19.30 við einum góðum kaffi- og temunni, síðani drúgvum og góðum felagssangi og góðum frásagnum. Noel Joensen og Jónleif Johannesen spældu lystiliga undir til sangin á guitar og harmoniku.

Klokkan 21.30 varð farið uppá gólv har m.a. Vaagen varð kvøðin. Síðani varð kvøðið í ein tíma ymisk løtt kvæði og lættar vísur.

Vaagen

Eg fór mær til Íslands í fjør,

 – tað hevði eg ætlað so leingi –

at vinna mær pening og síggja meg um

sum aðrir dugandi dreingir.

   Men fram rann Vaagen, yvir hav

   hon mangan vin førdi.

Vaagen stóð í Føringatíðindi 1894:4. Jóan Petur Gregoriussen (IPG) yrkti hesa vísu, um ein ringan túr í oktober 1888 við tí norska skipinum, Vaagen. Teir mundi gingið burtur undir Fugloynni við føroyskum útróðrarmonnum og fiskagentum, ið høvdu verið í Íslandi.

Lagið er “Ebbe Skammelsøn”.

Tiltakið var ókeypis, har øll eru hjartaliga vælkomin. Tó at tað var kalt og ófísið, møtti nakað av fólki.