Men hendan vikan er heilt serlig í Spinnarínum, tí hesa vikuna hava Gunnhild Dahl Niclasen og Kári Klettskarð í Kongsstovu matstovu í hølunum hjá Áhugafelagnum.

Í matstovuni, sum verður opin hósdagin frá 17 til 19 og allan leygardagin frá 11 til 18 selja Gunhild og Kári ræsta súpan, smurt breyð, súltaðar røtur og hvannir og heimagjørt pesto afturvið. Og omaná kanst tú keypa tær rabarbutriflu, hvíttvíngløgg, heimagjørdar rómakaramellur og havragrýnskúlur.

Leygardagin verður umframt matstovuna søluborð hjá kreativum fólkum og framsýning frá ullarkvøldunum í heyst. Nevndarlimir í felagnum verða eisini við og kunnu greiða frá virkseminum hjá felagnum og visa verkstaðin fram. Maskinurnar hjá felagnum verða eisini brúktar á degnum, og áhugað kunnu síggja, hvussu nýggi rívarin riggar.

Áhugafelagið Spinnaríið hevur eina nevnd við fimm limum og einum varðalimi. Alt arbeiðið hjá nevndini er sjálvboðið, og higartil í ár hava tey skipað fyri fleiri skeiðum, ullakvøldum og framsýningum. Komandi ár er ætlanin at halda fram við spennandi ullaskeiðum í vár, ferðafólkatiltøkum í summar og ullakvøldum næsta heyst. Harumframt vaskar og rívir felagið ull frá bóndum í norðoyggjum og eysturoynni.

Hóskvøldið 11. desember frá 17-19: Matstova og ullakvøld

Leygardagin 13. desember klokkan 11-18: Matstova, framsýning og søluborð