Ahmed Latif og Claes Kronberg eru farnir úr hópinum, sum endaði kappingarárið 2025, meðan tað enn er ivasamt við Mads Boe Mikkelsen, sum hevur havt eitt ynski um at royna okkurt nýtt í Danmark.

Eingin tilgongd hevur verið enn. U21-landsliðsleikarin Jákup N. Vilhelmsen, hevur sáttmála við KÍ og væntast at verða partur av hópinum fyrstu vikurnar, har partarnir síðani meta um hvønn annan og hvørji útlit eru fyri spælitíð. Norski álopsleikarin Jakon Rømo Skille hevur verið settur ísamband við KÍ, men tað er óvist sambært okkara keldum, um nakað spyrt burturúr tí, men samband hevur verið millum partarnar.

KÍ fer at fáa tilgongd, men sum tað liggur í kortunum nú, so verður talan um fáar leikarar. Tó koma helst í minsta lagi tveir nýggir og har verður sum skilst hugt eftir leikarum til álopspartin. Bæði ein álopsleikari og ein skapandi leikari. Fyrr í ár ljóðaði, at KÍ kanska aftur fór at royna tilgongd úr Argentina, men tað er nú meira ivasamt, og tí er kanska meir sannlíkt, at hugt verður í Skandinavia.

Tað skal sum skilst ikki avskrivast, at tilgongdin fer at telja fleiri enn tveir leikarar, men sum støðan er nú, so kann væntast eitt friðarligt flytingarvindeygað við nógv minni útskifting enn flestu av undanfarnu árum.