Byrjað varð við eini framløgu og síðani var landsstýriskvinnan víst runt á oljureinsiverkinum, serliga vandamikið burturkast, skiljihøllini fyri pappír, papp, plas og pant og móttøkuhøllini. Farið varð ikki í ovnhøllina henda dagin, tí ovnurin var sløktur vegna regluligt viðlíkahald.

Sigurd L. Lamhauge, stjóri hjá IRF, greiddi frá virkseminum hjá IRF, lýsti umhvørvisátøk, sum IRF hevur gjørt og hvørjar ætlanir liggja fyri framman. Tosað varð eisini um, hvussu ein størri partur av burturkastinum kann endurnýtast, um nýggju pantskipanina, sum eftir ætlan kemur at virka fyrst í komandi ári, og eisini varð nomið við nýggju burturkastkunngerðina, sum Landsstýrið arbeiður við.

Á burturkastøkinum eru nógvar avbjóðingar, men eisini fleiri møguleikar fyri menning. Eitt nú er ein royndarverkætlan í gongd, har ætlanin er at endurvinna glas og keramik í Føroyum, ístaðin fyri at tyrva tað.

Sigurd L. Lamhauge, stjóri, fegnast um vitjanina.
– Bæði pantskipanin og nýggja burturkastkunngerðin eru tvey týdningarmikil mál, um vit skulu gera nakað munagott á burturkastøkinum. IRF ynskir at hava ein aktivan leiklut í arbeiðinum við burðardygd, har vit í størri mun síggja burturkast sum virðismikið tilfeingi, sigur Sigur L. Lamhauge.

IRF takkar fyri vitjanina.