Politistalið á veg úr Danmark til Grønlands – við Atlantsflogi
Atlantic Airways flýgur í skrivandi stund danskar politistar til Grønlands í sambandi við vitjan úr USA. Ríkisløgreglan er fáorðað, men váttar, at tey hava "chartrað" eitt flogfar at flúgva løgreglufólk til Grønlands. Eisini váttar samskiftisstjórin hjá Ríkispolitium, René Gyldensten, at tað verður gjørt í sambandi við vitjanina úr USA.
Upplýst verður, at eitt vanligt ferðafólkaflogfar er farið úr Midtjyllands Lufthavn í Karup kl. 12:30 danska tíð í dag, og tað verður rópt ein ”ekstraordinær flyvning”. Talan er um ein Airbus A320 við rúmi fyri umleið 160 ferðafólkum, og á Flightradar stendur, at flogfarið er frá Atlantic Airways.
Kona J. D. Vance ávegis
Varaforsetin í USA, J. D. Vance, hevur sent konu sína til Grønlands, og hon kemur hagar í komandi viku. Hon eitur Usha Vance, og sigur seg skula hyggja at hundasleðu-renning. Við henni á ferðini er trygdarráðgevin Mike Waltz. Tey væntast til Grønlans 29. mars, sum er komandi leygardag.
Vitjanin hendir beint eftir grønlendska valið, har samgongusamráðingar framvegis fara fram. Eisini er eitt kommunuval ávegis. Viðmerkjarin Hans Engell hevur áður skrivað, at vitjanin sýnir vantandi virðing fyri bæði grønlendskum og donskum myndugleikum, og hann heldur frágreiðingina um hundasleðu-renning vera nakað humbukk ella ”en dødssyg forklaring”, sum hann orðar tað.
Keldur: