Byrgingin um Haraldssund kostar 72 milliónir krónur
Hóast verkætlanin hevur verið viðgjørd politiskt fleiri ferðir, er neyðuga játtanin enn ikki fingin til vega. Tað upplýsir landsstýrismaðurin í vinnumálum, Jacob Vestergaard, í svari til ein skrivligan fyrispurning frá Eiriki í Jákupsstovu
Sambært Landsverki er kostnaðurin fyri verkætlanina mettur til umleið 72 milliónir krónur. Í metingini er eitt váðaískoyti upp á 30 prosent.
Verkætlanin fevnir um at breiðka vegin, so hann fær tvær farbreytir, umframt gongu- og súkklubreyt. Eisini skulu gøtuljós setast upp, og verjugrótið á norðaru síðuni hækkast fyri at verja betur móti sjóroki.
Byrgingin um Haraldssund er umleið 350 metrar long, og á størsta partinum av teininum er vegurin í dag ikki nóg breiður til, at tvey akfør kunnu møtast uttan trupulleikar.
Jacob Vestergaard sigur, at ferðsluviðurskiftini um Haraldssund skulu vera í lagi, og at verkætlanin fer at gera farleiðina tíðarhóskandi. Hann staðfestir samstundis, at íløgukarmurin er avmarkaður, men vónar, at tað fer at bera til at raðfesta verkætlanina komandi árini.
mynd Oliver Joensen