Lágtrýstið, sum fer at geva okkum hetta veðrið, stóð yvir Jan Mayen í nátt og gongur haðani skjótt í landsynning ímóti Vesturnoregi. Tá ið tað er tættast við okkum (klokkan 15-17), er miðjan á tí einar 250 í landnyrðing úr Fugloynni. Mesti vindurin er vestan og sunnan fyri miðjuna, og tað er tað økið, sum kemur beint aftaná og leggur seg yvir okkum í kvøld.

Vindurin er veksandi av høgari vesturætt ella útnyrðingi í løtuni. Miðalvindferðin á middegi var 10 til 15 m/s, og um eina løtu er hann komin upp í 13 til 18 m/s. Tað er samdrigið í erva, og vit hava havt ælaveður, men út á seinnapartin verður støðugt avfall, í byrjanini regn, men sum hitalagið fer niðureftir, eisini vátakavi.

Mesti vindurin er frá klokkkan 18 og út á kvøldið. Tá er ættin farin upp í útnyrðing norðan, og miðalvindferðin 15 til 20 m/s. Hvirlurnar eru ikki lættar at seta tal á, men í óstøðugari luft kunnu vit í støðum leggja helvtina afturat og koma til 30 m/s.  

Á midnátt er vindurin minkaður niður í 13 til 18 m/s.

Taka vit avfallið í kvøld, so er regn ella vátakavi fyrstu tímarnar. Millum 21 og 23 minni avfall, ælaveður. So er aftur samregn ella vátakavi út á náttina og inn í tað nýggja árið.  

Við hesum verður ynskt øllum eitt gott og eydnuberandi nýggjar.