Orsøkin er eitt lágtrýst, sum fer at leggja seg á leiðina sunnan fyri Ísland, og tað fer at draga luft til sín. Vit fara at liggja eystan fyri miðjuna á lágtrýstinum, har sum ættin er millum sunnan og eystan. Langt er ímillum lág- og hátrýst í dag og í morgin, so onkra løtu fer hann at mala av ymsum ættum.  

 Veðrið um vikuskiftið:

Í dag er eitt lítið lot av landsynningi, minni enn 5 m/s, skýggjað og ælaveður, sirm ella mjørki í støðum. Eitt sindur út á seinnapartin verður hann eystan. Í kvøld er lítið lot av ymsum ættum, skýggjað og ælaveður, stundum grov æl, skúrar. Hitin 7 til 10 stig, í nátt niður í 5 stig.

Í morgin er eitt lítið lot av landnyrðingi, minni enn 5 m/s, skýggjað og ælaveður, stundum grov æl, skúrar. Seinnapartin lot til frískt lot eystan, 3 til 8 m/s, samdrigið og ælaveður, men út á kvøldið regn. Hitin 8 til 10 stig.

Sunnudagin er eitt lítið lot av landsynningi, minni enn 5 m/s, skýggjað, regn og mjørki í støðum. Eitt skiftið seinnapartin og um kvøldið yvirhøvur turt, men sirm ella mjørki í støðum. Út á kvøldið lot til frískt lot eystan, 3 til 8 m/s, skýggjað, regn og mjørki í støðum. Um náttina frískt lot til frískan vind eystan 5 til 10 m/s. Hitin 8 til 10 stig.

Gott vikuskifti.