Í fíggjarlógaruppskotinum hjá Ruth Vang, ið lagt varð fram í morgun, so er gott í væntu á samferðsluøkinum: Suðuroyartunnilin fær 100 milliónir afturat, farleiðin til Tjørnuvíkar 5 milliónir, verandi brýr og tunlar fáa 14 milliónir til dagføringar, brúgvin um Streymin 22 milliónir, og so verða 12 milliónir brúktar til asfaltering. Byrjað verður at gera nýggjar ferjur til Kalsoyarleiðina í 2026 og eina aðra ferju til Fugloyar- og Svínoyarleiðina. Kalsoyarferja verður klár í 2028. Hørðu virðini fara ikki at hava tað heilt galið í bráttkomandi tíðum.   

Flosklar um bústaðartrupulleikan og býlisstuðulin

Men tá tað kemur til bústaðartrotið, so var framløgan hjá Ruth Vang ikki so upplyftandi. Boðskapurin er framvegis hin sami sum mongu undanfarnu árini, nevniliga at ”Arbeitt verður við loysnum”, ”Avbjóðingar eyðmerktar”, ”Uppskot eru á veg” og ”Tillaging tekur tíð”, stendur í framløguni. So bústaðarsøkjandi mugu framvegis brynja seg við toli. Enn meira toli.

Tað sama ger seg galdandi við býlisstuðuli til leigubústaðir. Í fíggjarlógaruppskotinum stendur, at ”Endamálið við leigustuðulinum er at skapa javnvág í bústaðarmarknaðinum og tryggja, at tey, sum ikki eiga sítt egna heim, fáa ein stuðul til bústaðin. Stuðulin verður veittur mánaðarliga. Ætlandi fær leigustuðulin virknað á vári 2026.”, og víðari stendur, at uppskotið kemur í vetur, og at tað verður innanfyri karmin upp á 7.171 mió.

Tað er tó eitt sindur ivasamt, hvussu tað skal skiljast, tí Ruth Vang segði eisini, at undirskotið upp á 173 milliónir ikki er endaliga talið, men at endaliga undirskotið bíðar eftir leigustuðlinum.