Ein skrá varð gjørd fyri at leggja vitjanina betri tilrættis:
kl. 10.00 sóu tey Húsarhaldsskúli Føroya, har Jóhanna á Tjaldrafløtti, skúlastjóri, greiddi frá. Tey eru nú væl áleiðis við at innrætta seg, áðrenn skúlabyrjan í august 2025.

35 næmingar kunnu ganga og búgva á skúlanum, sum eisini bjóðar øll handans skeið í summarhálvuni.

Húsarhaldsskúli Føroya hevur hátíðarhildið 50 ára føðingardag sín í ár. Øll árini hevur eftirspurningurin til skúlan verið stórur. Men nú tað kunnu verða 35 næmingar á komandi skúlaári, so er eftirspurningurin so stórur, at væl meir enn tað dupulta stendur í bíðirøð.

So tað er umráðandi og spennandi at fáa henda snotiliga og rúmliga bygning tiknan í nýtslu á hesum prýðiliga staði.

kl. 10.30 sóu tey 14 fólkini á Byggideildini Neystið, har Dávur Winther greiddi frá – Í skemti varð sagt, at tey kundi sleppa at síggja Klaksvíking, men ikki nema við hann!

Bygningurin, sniðið og tað, hann kundi á hesi vøkru staðseting, hugtók gestirnar.

kl. 11.00 sóu tey KG, har Sørmundur Árni Kalsø, verkætlanarleiðari greiddi frá byggingini og teimum serligu samansetingini av konstruktiónini, sum í onkrum førum er rættiliga sjálvberandi við stórum úthangi.

Summar av súlunum eru bert settar upp í eini byrjunartíð, sum hjálp til at bera undir stoyping, men skulu takast burturaftur. Hetta er eitt spennandi verkfrøðingararbeiði, sum hevur sína avbjóðingar, greiddi Sørmundur frá.

Síðani var farið upp á takið, har vit sóu neyvari tann stóra takgluggan ella skeilettið, sum fevnir um alla forhøllina.

Í uppskotinum til byggisamtykt fyri miðbýin, sum Ósbjørn Jacobsen hevur gjørt – eins og teknað hotellið, verður sagt, at allar fimm framsíðurnar – eisini takið, skulu verða væl umhugsaðar við skilgóðum arkitektoniskum loysnum.

Tí er eisini ætlanin, at KG skal hava flag lagt á, kring um tann stóra takgluggan. Sama hevur húsarhaldsskúlin og neystið nakað av flagi, fyri eisini at prýða um.

Eitt ótrúliga spennandi bygningsverk, sum rættiliga kemur at flyta Klaksvík fram í tíð!

Síðani varð kl. 11.30 farið í Varpið, har greitt varð frá bygging, fígging, ljóð- og tøkni, tiltøkum og hvussu fleksibult húsið er til so ymiska nýtslu.

Eftir tað lá leiðin til Kunoyar at fáa ein betri bita.

Jú, fólkini á Bygningsdeildini hjá Tórshavnar Kommunu við Johan Syderbø, leiðara, á odda vóru hugtikin av hesum spennandi miðbýi, sum tó at hann hevði ligið leingi í stoypiskeiðini, nú eftir fáum árum rættiliga er farin at vísa sínar spennandi dygdir.

Sanniliga eina vitjan verdur, hildu tey fyri og takkaðu fyri.